Monday, May 13, 2019

IS ත්‍රස්තවාදියෙකුට සුළුදිය පහවන අන්දමේ භීතියක් ඇතිකරවන "කාන්තා ආරක්ෂණ අංශ" (YPJ)


ලොව ම්ලේච්ඡම ත්‍රස්තවාදී සංවිධානයක් වන ISIS (ඉරාකයේ සහ සිරියාවේ ඉස්ලාමික රාජ්‍යය) නැතහොත් IS (ඉස්ලාමික රාජ්‍යය) හි සටන්කාමියෙකුට සිය ත්‍රස්තවාදී ජීවිතයේදී මුහුණ දීමට සිදුවිය හැකි බියකරුම දේවලින් එකක් වන්නේ හුදෙක් මියයාම නොව, ගැහැණියක අතින් මියයාමට සිදුවීමයි. IS ත්‍රස්තවාදියෙකුට සුළුදිය පහවන අන්දමේ භීතියක් ඇතිකරවන ස්ත්‍රීන් මෙළොව ජීවත් වේ නම් ඒ කුර්දි ගෝත්‍රික සටන්කාමී කාන්තාවෝ වෙති. නිරය සහ ස්වර්ගය යනු සත්‍යයකි යන ඇදහීම මත, ගැහැණියක අතින් මියයෑම යනු නින්දාවට හේතුවක් පමණක් නොව, ඔවුන් සෘජුව නිරයට ගෙන යෑමක් බව IS සාමාජිකයින්ගේ විශ්වාසය වෙයි. ස්වර්ගයේදී ලැබෙන කන්‍යාවන් 72 ක් අහිමි වීම ඔවුන්ගේ භීතියට මුලික හේතුව වෙයි.


කාන්තාවන්ගෙන් පමණක් සැදුම්ලත්, "කාන්තා ආරක්ෂණ අංශ" (YPJ) යන නමින් හැඳින්වෙන මෙම ක්‍රියාකාරී කාන්තා සෙබළියෝ මුලික වශයෙන් උතුරු සිරියාවේ ක්‍රියාන්විතයේ නියැළී සිටිති. කාන්තාවන් 7,000 සිට 10,000 දක්වා සංඛ්‍යාවකින් YPJ සමන්විත වන අතර ඔවුන්ගේ සාමාන්‍ය වයස අවුරුදු 18 සිට 25 දක්වා වේ.

පැහැදිළිවම පෙනෙන ආකාරයට, කුර්දි ගෝත්‍රික කාන්තා සෙබළියන් සමග සටනට පිවිසීම IS සටන්කාමීන්ගේ ඉමහත් භීතියට හේතු වෙයි. IS ත්‍රස්තවාදීන්ගේ ග්‍රහණයට හසුවන කාන්තාවකට අත්වන ඉරණම කුර්දි කාන්තා සෙබළියෝ හොඳින්ම දනිති. ඔවුන්ගේ යටත්වීමක් කිසිවිටෙක සිදු නොවේ. එබැවින් කුර්දි කාන්තා සෙබළියෝ සටන්බිමේදී පිරිමි සෙබළුන්ට වඩා ඉතා කාර්‍යක්ෂමශීලී වන අතර බිහිසුණු ඉදිරිපෙළ සටන්කාමීන් බවට පත්වෙති. මේ දක්වා ඔවුන්ගේ යුධමය සහභාගීත්වය කිසිදු අපකීර්තියකට භාජනය වී නොමැත. කාන්තා සෙබළියන් තුල තම පවුල, හිතමිතුරන්, සහ නිජබිම කෙරෙහි ඇති දැඩි ඇල්ම ද මීට දායක වෙයි.

සඳහන් කළයුතු විශේෂ කරුණ වන්නේ ඔවුන්ගේ ආගම ඉස්ලාමය වුවද අන්තගාමී විශ්වාස මුළුමනින්ම බැහැර කිරීමයි. සාම්ප්‍රදායික මුස්ලිම් සමාජයේ දකින්නට නොලැබෙන කාන්තා විමුක්තිය, තීරණ ගැනීමේ හැකියාව, වගකීම සහ සමානාත්මතාවය ඔවුන් අතර ප්‍රායෝගිකව ක්‍රියාත්මක වෙයි.

YPJ යනු ප්‍රධාන බලකායන් දෙකින් එකක් වන අතර, අනෙක් බලකාය, "මහජන ආරක්ෂක අංශ" (YPG) නමින් හැඳින්වේ. YPG සඳහා කාන්තාවන් මෙන්ම පිරිමි සටන්කාමීන් ද අයත් වෙයි. පොදුවේ ගත්කල මෙම බලකායන් දෙකම කුර්දි ගෝත්‍රිකයින්ගෙන් සමන්විත වන අතර අනෙකුත් සුළුතර ජනවාර්ගික කණ්ඩායම්ද ඇතුලත් වෙයි.

කුර්දි ගෝත්‍රික ජනතාව නිශ්චිත රාජ්‍යයකට හිමිකම් නොකියන ලොව විශාලතම ඩයස්පෝරාවන් ගෙන් එකක් වෙයි. තුර්කිය, ඉරානය, ඉරාකය, සිරියාව සහ ආර්මේනියාව යන රටවලට කඳුකර ප්‍රදේශවල මිලියන 35 ක් පමණ කුර්දි වැසියන් ජීවත් වේ.



1 comment:

මිනිස් ජීවිත බේරූ මරාගෙන මැරෙන බෝම්බකාරිය

අයිෂා නිහඬවම ටික දුරක් ඉදිරියට ඇවිදගෙන ගියාය. ඇයට මිනිසුන් මරා දමන්නට උවමනාවක් නැත. එහෙත් ඇය අසරණය. කරන්නට දෙයක් නැත. බඳ වටා බැඳ තිබුණු බෝ...