Friday, May 18, 2018

සෙබලෙකුගේ_ආදර_බිරිඳ


දණින් වැටී සුදු දෙපා ඉඹින්නට
මට හිමි නැති වාසනා පැයේ
හිමියනි නුඹගැන වීර පදක්කම්
ගෙල පළඳා කුමකටද අගේ


මේ දෙතොළැලි ඔය නළලේ තියලා
නුඹ උරයේ දඟ කරපු පැයේ
මේ සෙනෙහස අඩුවෙන් දැනුනාදෝ
මා තනිකර යුධ බිමට ගියේ

සුදු අප්පච්චී කෝ අපෙ අම්මේ
පොඩි දූ වද දෙනවානෙ ප්‍රියේ
තවත් බොරුකියා බෑ රවටන්නට
ඔයා එන්න උණුහුමට අපේ

යුගල ඇදක තනි යහන නිදන්නට
මා කල පවු කෙතරම්ද දැනේ
එහෙ මෙහෙ පෙරළී ඔබෙ රුව සෙවුවා
හිමි නැතිදා නිදිමරන රැයේ

ඔයා නොඑන්නට දූයි මායි කල
වරදද අපෙ ආදරය වුනේ
ඔය තුරුලට අපි දෙන්නා එන්නම්
සමාවෙන්න රත්තරන් මගේ

Wednesday, May 16, 2018

මහා පරිමාණයෙන් සිදුකල ළමා බිළි පූජාවක්

මහා පරිමාණයෙන් සිදුකල ළමා බිළි පූජාවක් පිළිබඳව දකුණු ඇමරිකාවේ පේරු රාජ්‍යයේ උතුරු වෙරළ තීරයෙන් සොයාගෙන ඇති අතර, බොහෝ දුරට එය ලෝක ඉතිහාසයේ විශාලතම ළමා බිළි පූජාව විය හැකි බව වාර්තා වෙයි.

මීට වසර 550 කට පමණ ඉහතදී, චිම්යූ (Chimú) අධිරාජ්‍යය පැතිර ගිය වකවානුවේ එහි අගනුවරට ආසන්නයේ, පැසිෆික් සාගරයට මුහුණලා පිහිටි කඳු බෑවුමක ඝාතනය කරන ලද පිරිමි ළමුන් 140 කට වඩා වැඩි සංඛ්‍යාවකගේ සහ ලාමා පැටවුන් 200 ක පමණ සිරුරු හමුවී තිබේ.

ඇස්ටෙක්, මායා සහ ඉන්කාවරුන් අතර මිනිස් බිළි පූජා කිරීමේ සිදුවීම්, යටත් විජිත සමයේ ස්පාඤ්ඤ ඉතිහාසයේ වාර්තා වී ඇති අතර, නූතන විද්‍යාත්මක කැණීම්වලින්ද සොයාගෙන ඇත. නමුත් මේසා විශාල පිරිමි ළමුන් සංඛ්‍යාවක් එකවර ඝාතනය කළ සිද්ධියක් මෙයට පෙර ලෝකයේ කිසිදු තැනකින් වාර්තා වී නැත.

පේරුහි උතුරුදිග Huanchaco දිස්ත්‍රික්කයේ, Huanchaquito-Las Llamas නැතහොත් කෙටියෙන් Las Llamas නමැති ප්‍රදේශයේ, මුහුදට අඩි 1000 ක් පමණ නුදුරින් පිහිටි ජනාකීර්ණ ප්‍රදේශයක මේ බිළි පුජාව පැවැත්වූ ස්ථානය පිහිටා තිබේ. යුනෙස්කෝ ලෝක උරුමයක් වන, පැරණි චිම්යූ පරිපාලන නගරය වූ Chan Chan මෙහි සිට සැතපුම් බාගයක් පමණ දුරින් පිහිටා තිබේ.

සිරුරු සමග තිබූ රැහැන් හා රෙදිපිළි රේඩියෝ කාබන් පරීක්ෂාවට ලක්කළ විට ඒවා වසර 1400 සිට 1450 දක්වා කාල පරිච්ඡේදයේ බව අනාවරණය වී තිබේ.

ළමුන් සහ සතුන් යන දෙකොටසේම පපු ඇටයේ තිරස් කැපුම් දක්නට ලැබෙන අතර ඉල ඇට බිඳී හා විසන්දි වී තිබේ. එයින් පැහැදිළි වන්නේ හෘදය ඉවත් කිරීමට පහසු වීම සඳහා පපු ඇටය කපා ඉල ඇට දෙපසට ඇද ඇති බවයි.

වැඩිහිටියන් තිදෙනෙකුගේ මළ සිරුරු, එනම් පිරිමියෙක් සහ ගැහැණුන් දෙදෙනෙකුගේ මළ සිරුරු ද මේ ආසන්නයේ තිබී සොයාගෙන ඇත. තිදෙනාගේම හිසට මොට උපකරණයකින් පහර දීම නිසා වූ බිඳීම් දක්නට ලැබේ. එම සිරුරු, බිළි පූජාවට ලක්වූ ළමුන්ගේ සිරුරු වලින් හාත්පසින් වෙනස් වෙයි. පර්යේෂකයන් අනුමාන කරන්නේ ඔවුන් බිලි පුජාව සම්බන්ධයෙන් යම්කිසි රාජකාරියක් ඉටු කරන්නට ඇති බවත්, ඉන් පසුව ඔවුන්වද මරා දමන්නට ඇති බවත්ය.

පිරිමි ළමුන් වයස අවුරුදු 5 සහ 14 අතර වයස් පරාසයේ වන අතර වැඩි දෙනා වයස අවුරුදු 8 ත් 12 ත් අතර වෙති. බොහෝ දෙනා මුහුද ඇති බටහිර දෙසට හිස සිටින පරිද්දෙන් වළලා තිබේ. ලාමා සතුන් වයස මාස 18 කට වඩා අඩු වෙන අතර ඇන්ඩීස් කඳු වැටිය ඇති නැගෙනහිර හිස සිටින පරිද්දෙන් වළලා තිබේ.

බිළි පුජා පිටියේ නැගෙනහිර දෙසට වන්නට ඇති, වර්ග අඩි 7,500 ක් පමණ වන ප්‍රදේශය පුරා ඇති වියළි මඩ තට්ටුවේ සාක්ෂි මත පදනම්ව, එක් අවස්තාවකදී ළමුන් සහ සතුන් ඝාතන සියල්ලම සිදුවී තිබේ. බිළි පුජාව පැවැත්වූ කාලයේ දැනට ඇති වැලි කන්ද මුළුමනින්ම මඩින් වැසී තිබෙන්නට ඇත.

පුරාවිද්‍යාඥයන් විසින් වියළි මඩ තට්ටුවෙන් පාවහන් පැළදි වැඩිහිටියන්ගේ, සුනඛයන්ගේ, පාවහන් නොපැළඳි දරුවන්ගේ සහ ලාමා පැටවුන් ගේ පාද සලකුණු සොයාගත් ලාමා පැටවුන්ගේ පාද සලකුණු ගැඹුරු ලිස්සා ගිය ආකාරයක් පෙන්නුම් කරයි. ඔවුන් ඔවුන්ගේ ඉරණම දක්වා බලහත්කාරයෙන් ඇදගෙන යන්නට ඇත.

පුරාවිද්‍යාඥයින්ගේ නිගමන නිවැරදි නම්, ලෝක ඉතිහාසයේ විශාලතම ළමා බිළි පූජාව වන්නේ Huanchaquito-Las Llamas හි සිදුකල බිළි පුජාවයි.

මේ වන තුරු, අපට භෞතික සාක්ෂි තිබූ විශාලතම සමූහ ළමා බිළි පූජා සිද්ධිය වුයේ, ඇස්ටෙක් වරුන්ගේ අගනගරය වූ Tenochtitlán (වර්තමානයේ මෙක්සිකෝ නගරය) හි Templo Mayor දේවස්ථානයේ දරුවන් 42 දෙනකුගේ චාරිත්‍රානුකූල බිලිදීමයි.

Las Llamas බිළි පුජාවේ දක්නට ලැබෙන සුවිශේෂී ලක්ෂණයක් වන්නේ දරුවන් හා ලාමා යන දෙවර්ගයේම පපු ඇටයේ ඇති තිරස් කැපුම්, ස්ථාවර, කාර්යක්ෂම සහ නොසැළෙන දෑතකින් සිදුකර ඇති බවයි. පසුබට වීමක් රහිත කැපුම් වලින් පෙන්නුම් කෙරෙන්නේ, ඒවා ඒ සඳහාම හොඳින් පුහුණු කරන ලද අත් දෙකකින් හෝ කීපයකින් කර ඇති බවයි.

කෙසේ වෙතත්, Las Llamas හි සිදු වූ ළමුන්ගේ හා ලාමා පැටවුන්ගේ බිළි පුජාව, නව පුරාවිද්‍යාත්මක සොයාගැනීමක් වන අතරම එය කුමන අරමුණක් උදෙසා සිදුකර ඇද්ද යන ගැටලුව මතු කරයි







දවාල රෑ වුණු එ දවස

1955 ජූනි 20දා ලංකාවටම අමතක නොවන දිනයකි. ඒ එදා දහවල රටම මහා රෑ ඝන අදුර මෙන් කරුවල වී ගිය හෙයිනි. එදා ජූනි 20 සඳුදා දිනයකි. සූර්යග්‍රහණය නිසා ලංකාවේ සියලුම පාසල්වලට රජය විසින් නිවාඩු දී තිබුණි. 20 වෙනිදා උදේ 8.11 ඇරඹෙන මේ අපූරු සිදුවීම දැකබලා ගැනීමට ලංකාවට විදෙස් රටවල ග්‍රහවිද්‍යාඥයන් කඳවුරු බැඳගෙන ඒ මොහොත එළැමෙනතුරු බලා සිටියේය.
පොලොන්නරුව, කදුරුවෙල, හිඟුරක්ගොඩ, සිගිරිය, ත්‍රිකුණාමලයෙහි මෙසේ විදේශිකයන් රැසක් කඳවුරු බැඳ බලා සිටියේය.
සූර්යග්‍රහණය බැලීමට වෛද්‍යවරුන් එදා අනුමත කළ කණ්ණාඩි විශාලවශයෙන් විකිණිනි. රට පුරා විහාරස්ථානවල ඒ මොහොතේ සෙත්පිරිත් සූදානම්කර තිබුණි. සමහරු මන්ත්‍ර ජපකරන ලදී. නමුත් එක් රටකට එය අධ්‍යයන කිරීමට එවකට සිටි මෙරට බලධාරින් මෙරටට ඒමට අවසර නොදුන් බව කියයි. ඒ සෝවියට් සමූහආණ්ඩුවයි. එවකට සිටි රජයෙන් සෝවියට් සමූහආණ්ඩුව ඉල්ලීම් කරත් ඔවුනට එයට අවස්ථාව නොදුන් බවට කියවේ.
එදා පැවති ඉරිදා ලංකාදීප පුවත්පත මගින් එවකට සිටි එක්තරා දේශීය වෛද්‍යවරයකු විසින් 1955 ජූනි 19 දින ඉරිදා ලංකාදීප මුල්පිටුවේ සුර්යග්‍රහණ වෙලාවේදී පානය කිරීමට අපූරු බෙහෙතක් සඳහන් කර තිබුණි. ඒ වදකහ යුෂයි. වදකහ සියුම්ව අඹරා ඒ සඳහා විවිධ අනුපාතවලින් පානය කළහොත් ශරීරයේ විවිධ ආබාධ දුරුවී සුවදායක තත්ත්වයක් මතුවන බව ඒ ඉරිදා ජාතික පුවත්පතේ මුල් පිටුවේ සඳහන් කර තිබුණි.
තැඹිලි වතුරින් බීවිට බුද්ධිය වර්ධනය වන බවත් කොත්තමල්ලි වතුරින් බී විට රූපශෝභාව වැඩිවන බවත් ආදී ලෙසින් මාත්‍රා පහකින් වදකහ බීමට නියම කර තිබුණි. වතුර බේසමකට නිල් දියකර සූර්යග්‍රහණය බැලීමට නියමකර තිබුණි. නැතහොත් කළු කණ්ණාඩියකින් හෝ කළු සෙලෝටේප් පටියකින් බැලීමට නියමකර තිබුණි. කෙලින්ම සූර්යග්‍රහණය පියවි ඇසින් බැලුවහොත් ඇස් අන්ධ වන බව එදා පුවත්පත්වල සඳහන්කර තිබුණි. හැම වෙද නිවසකම වදකහ බෙහෙත නියමිත මාත්‍රාවලින් සකස්කර ජනයාට ලබාදුනි. විවිධ පුද්ගලයන් බෙහෙත් බඩු කඩෙන් ගත් වදකහ තමන්ට සිතගි මාත්‍රාවලින් සාදාගත්තේය.
සූර්යග්‍රහණය වෙලාවේ වදකහ විවිධ මාත්‍රාවලින් බීමෙන් රූප‍ශෝභාව වැඩිවීමට, බුද්ධිය වර්ධනයට, කාලාන්තරයක් තිස්සේ පැවැති ලෙඩ රෝග සුවවීමට හා කටපාඩම් හිටීමට ඉතා සුදුසු ඖෂධයක් බව පුවතේ පළවී තිබුණි.
නියමිත ජූනි 20 උදෑසන එළැබිණි. සූර්යග්‍රහණය එම සඳුද උදේ 8.11 සිට 8.15 ඇරැඹිණි. රටම අඳුරේ ගිලී ගියේය. කපුටන් ඇතුළු කුරුළු රෑන් කෑගසමින් සිය කූඩු කරා නැවත පියඹායන්නට විය. උදේ දිගෙලිකර වතුවල තණ කමින් සිටි හරකුන් රාත්‍රී ඇතිවී ඇතැයි ගාලට නොදැමීම නිසා බියවී කෑගසන්ටවිය. රාත්‍රී පිපෙන මල් පිපෙන්නට විය.නැවත එළිය වැටීමත් සමග ඈත මෑත පියාඹමින් වල්මත් වී සිටි පක්ෂීන් කීචි බීචි හඬ නඟමින් මහත් ප්‍රීතියෙන් නැවතත් පුරුදු ජීවන රටාවේ නියැළුණු අයුරු එකළ පුවත්පත් මගින් කියවුණි. පක්ෂීන් පමණක් නොව දෙහිවල සත්වෝද්‍යානයේ සිටි අලි ඇතුන්, ව්‍යාඝ්‍රයන් ඇතුළු සතුන් අමුතු ආකාරයකින් හඩනැඟීමට පටන් ගත් බවද කියවේ.
බොහෝ පිරිස් විවිධ මාත්‍රාවලින් සෑදූ වදකහ බොන්නට ගත්හ. සමහරු විශාල ප්‍රමාණයෙන් වැරදි මාත්‍රාවෙන් බොන්න විය.
වද කහ බිව් බොහෝ දෙනාට වමනය හා බඩඑළිය යෑම ආදී රෝග මතුවිය. රටපුරා එකවර වැඩිම පිරිසක් රෝහල්වලට ඇතුළුවූ ඉතිහාසයේ පළමු දවස මෙය විය. රූපශෝභාව වැඩිවීමටත් බුද්ධිය වැඩිවීමටත් මෙසේ බොහෝ පිරිස් නියමිත මාත්‍රාව ඉක්මවා වදකහ බී තිබුණි.
සූර්යග්‍රහණය බැලීමට ගොස් දෙදෙනකු මැරී වැටුණි. දෙදෙනකුගේ ඇස් අන්ධවිය.
පසුදින ලංකාදීප පුවත්පතේ වමනයට බෙහෙත් සඳහන් කර තිබුණි.
රටේම අය වදකහ බී ලෙඩවීම නිසා ලංකාදීප පුවත්පතේ වදකහ බෙහෙතට එරෙහිව දිනමිණ ‘වදකහ’ නමින් තීරු ලිපියක් ද පටන්ගෙන තිබුණි. ඉන්පසු එය ටික කලකින් නැවතුණි.ලංකාවට දර්ශනය වූ එම සූර්යග්‍රහණය පූර්ණ සූර්යග්‍රහණයක් ලෙස සටහන් වී ඇති අතර ලංකාව හැරුණු විට එය දර්ශනය වී ඇත්තේ සියමය, වියට්නාමය, පිලිපීනය යන රටවලට පමණි. විනාඩි 7 යි තත්පර 8 ක් පුරා සිදුවූ මේ සූර්යග්‍රහණය විශාලතම සූර්යග්‍රහණයක් ලෙස හැඳින්වේ.මෙකළ සිටි ජනප්‍රිය බයිලා ගායක වොලී බැස්ටියන් විසින් නිර්මාණය කොට ගායනා කරන්නට යෙදුණු බයිලා ගීතය නිසා යි ලංකාදීප පුවත්පතේ ඉල්ලුමත් අඩු වුණු බවක්ද පැරුන්නන් කියති . අද එම බිව්වා නේද වදකහ සුදිය බයිලාව සෑම සාජ්ජයකදී ඇසෙන බයිලාවක් බවට පත්ව ඇත.

බිව්වා නේද වදකහ සුදිය

ජහ ජහ ජහ ජහ

බිව්වා නේද වදකහ සුදිය..”

දවාල රෑවුණු එ දවසේ

එමලි ගියා පිළි කන්නට විගසේ

බිව්වා නේද වදකහ සුදිය..



මරාගෙන මැරෙන කුහුඹුවන්

විද්‍යාඥයන්ට මෑතකදී බෝනියෝ වනාන්තරවල වාසය කරන නව කුහුඹු විශේෂයක් හමුවී ඇත. ඔවුන්ගේ විද්‍යාත්මක නාමය Colobopsis explodens වන අතර, නමින් හැඳින්වෙන පරිදිම ඔවුහු පුපුරා යති.

ආහාර සොයා යන කුහුඹුවන්, කුහුඹු ජනපදයෙන් උදෑසන 6 ට පමණ පිටවන අතර ආපසු පැමිණෙන්නේ සවස 6 ට පමණ වෙයි. ඒ අතරතුර කාලයේදී කුහුඹුවන්ගෙන් කොටසක් කුහුඹු ජනපදයේ දොරටුව ආරක්ෂා කරති. එමෙන්ම, දවසේ වැඩ නිමාවී ජනපදයට නැවත ඇතුළුවන කූඹියන් එකින් එකා හොඳින් පරීක්ෂා කර බලති. ඕනෑම මොහොතක යම් ආගන්තුකයෙක් ජනපදය ආක්‍රමණය කරන්නට උත්සාහ ගන්නේ නම්, ඕනෑම කුහුඹුවෙකුට "මරාගෙන මැරීමේ" හැකියාව ඇත.


Colobopsis explodens කෘමි විශේෂයේ උදරය ග්‍රන්ථීමය කෝෂ වලින් පිරී තිබෙන අතර, අනතුරුදායක අවස්ථාවකදී සිය උදරය වේගයෙන් ඉහළට එසවීම මගින් එය පුපුරවා ගනියි. ග්‍රන්ථීමය කෝෂ වල පිරී තිබෙන ඇලෙනසුළු විෂ ස‍්‍රාවයක් ස්පර්ශයෙන් සතුරා අකර්මණ්‍ය වන අතර අවසානයේ මියයයි. විද්‍යාඥයන් පවසන පරිදි, මෙම ස‍්‍රාවය තරමක් දුරට කුළුබඩු වල අඩංගු සුවඳක් වැනි වෙයි.

වෙනත් ඕනෑම කුහුඹු ජනපදයක මෙන්ම මොවුන්ගේද විවිධ කාර්‍යයන් ඉටුකරන කුහුඹු කොට්ටාශ වෙයි. උදරය පුපුරවාගන්නා කොට්ටාශය හැරුණු විට, වෙනත් ආරක්‍ෂිත උපක්‍රමයක් යොදාගන්නා විශාල හිසක් සහිත සොල්දාදුවන් කොට්ටාශයක්ද වෙයි. පුපුරුවා ගැනීම වෙනුවට, තම හිස දොරක් ලෙස යොදා ගනිති. එනම්, සතුරු ආක්‍රමණයකදී, තම ජනපදයට ඇතුළුවන සිදුර හිස මගින් අවහිර කරති.

Colobopsis exploden කුහුඹුවන් බහුතරයක් ගැහැණු සතුන් වන අතර, අත්තටු ඇති පිරිමි කුහුඹුවන්, සිටිනුයේ ඉතාමත් සුළු සංඛ්‍යාවකි.

Monday, May 14, 2018

ගිය කෙනෙක් ආයෙත් නොඑන බුරුතු පිටින් අතුරුදන් වෙන හොයියා බාචු.

වයඹදිග රුමේනියාවේ, (එරට වැසියන් ශබ්ද කරන ආකාරයට රොමා නියා) ක්ලුෂ් - නපෝකා නගරයේ හෙක්ටයාර් 250ක පමණ ප්‍රදේශයක් පුරා පැතිර පවතින හොයියා බාචු (Hoia baciu) වනාන්තාරය සැලකෙන්නේ ලොව වඩාත්ම භූතාවිශ්ට වනාන්තරය ලෙසයි. එනිසාම රුමේනියානු වැසියන් එය හඳුන්වන්නේ 'ගොඩබිම බර්මියුඩා ත්‍රිකෝණය" නමින්ය. මෙම වනය තුළ අවතාර ගැවසෙනු බොහෝ දෙනා දැක ඇති අතර තේරුම් කළ නොහැකි සිදුවීම්, ඡායාරූපවල අද්භූත මුහුණු සටහන් වීම් ආදිය පිළිබඳ ඊට මුහුණ දුන් බොහෝ දෙනා අනාවරණය කොට තිබෙනවා. ඒ විතරක් නොවෙයි, 1970 ගණන්වල මේ තුළ අද්භූත යානයක් දුටු කීප දෙනකුම ඒ පිළිබඳව වාර්තාකොට තිබුණා.

මෙම වනයට ඇතුළු වන පුද්ගලයන් පවසන්නේ තමන් දෙස කවුරුන් හෝ බලා සිටින බවක් තමන්ට දැනෙන බවයි. ඒ වගේම මෙම වනාන්තරය තුළ පිහිටි අමුතුම ආකාරයේ තුරුලතා ආදියත් ඒ අද්භූත බව තවත් තීව්‍ර කරනවා.

හොයියා බාචු අද්භූත වනාන්තරයක් ලෙස මුලින්ම හැඳින්වීමට පෙලඹී ඇත්තේ 200ක ගව පට්ටියක්ද දක්කාගෙන මේ වනයට ඇතුළු වූ එ‍ෙඩ්රෙක් අතුරුදන් වීමද සමඟයි. මේ වනාන්තරය අවට වෙසෙන කිසිවකු එම සිද්ධියෙන් අනතුරුව වනයට ඇතුළු වීමට උත්සාහ කරන්නේ නැහැ. ඊට ඇතුළු වුණොත් නැවත පැමිණීමට නොලැබෙන බව ඔවුන් තදින්ම විශ්වාස කරනවා. නමුත් ඒ අතර වනාන්තරයට ඇතුළු වීමට තරම් දිරියක් ඇති පුද්ගලයන් නැවත ඉන් පිටතට පැමිණි විට සමේ දද ඇතිවීම්, ඔක්කාරය, වමනය, හිසරදය, පිලිස්සීම්, සීරීම් ආදී අද්භූත සිදුවීම් ගැන වාර්තා කොට තිබෙනවා.

හොයියා - බාචු වනාන්තරය පිළිබඳ අවධානය යොමුවන්නට පටන් ගෙන ඇත්තේ එහි ඇතුළු වූ ඇලෙක්සැන්ඩර් සිෆ්ට් නම් ජීව විද්‍යාඥයකු වනයට ඉහළ අහසේ ගමන් කරමින් තිබූ පියාඹන පීරිසි ආකාරයේ වස්තූන් කීපයක් ඡායාරූපගත කිරීමද සමඟයි. ඉන් අනතුරුව 1968 යුද හමුදා කාර්මිකයකු වු එමිල් බර්නියා විසින්ද මෙම වනාන්තරයට ඉහළ අහසේ ගමන් කළ පියාඹන පීරිසියක දර්ශනයක් ඡායාරූපගත කිරීමට සමත්ව තිබෙනවා.

මෙම වනය තුළට රැගෙන යන ඉලෙක්ට්‍රොනික් උපකරණ පවා ක්‍රියා විරහිත වන බවද සඳහන් වෙනවා. මෙවැනි අද්භූත සිදුවීම් පිළිබඳ විමර්ශනයන් කරන පුද්ගලයන් පවසන අන්දමටද එය භූතාත්ම විසින් සිදුකරන බලපෑම් නිසා සිදුවන්නක්. වනාන්තරය අවට ජීවත්වන පුද්ගලයන් එතුළින් රාත්‍රි කාලයේදී වැලපෙන කාන්තාවන්ගේ හඬවල්ද ඇසෙන බව සඳහන් කරනවා.

සමහරු විශ්වාස කරන්නේ මෙය තවත් නොපෙනෙන මානයකට ඇතුළුවීම සඳහා වන ද්වාරයක් බවයි. මෙතුළින් නිතර නිතර අද්භූත එළි විහිදෙන අයුරු අවට වැසියන් දැක ඇති අතර සමහරු මෙතුළ අතරමං වී නැවත පැය කිහිපයකට පසු පිටතට පැමිණි විට ඊට පෙර සිදුවූ කිසිවක් තමන්ට මතක නැති බව සඳහන් කළ අවස්ථාද නැත්තේ නැහැ.

මෑතකදී මෙම වනාන්තරය තුළ සිදුවීම් වාර්තා කිරීම සඳහා ගිය රූපවාහිනි නාළිකාවක විමර්ශකයකු නොපෙනෙන බලවේගයක් විසින් සූරා බිමට තල්ලුකොට ඇති බවද වාර්තා වූණා. ඊට පෙර තමන් අඳුරු කැලෑව තුළින් දිලිසෙන ඇස් වැනි ආලෝකයක් දුටු බවද ඔහු පවසා තිබුණා.

ගන වන ගහනයකින් යුත් මෙහි මධ්‍යයේ හරි කවාකාර පෙදෙසක් කුඩා පැළෑටියක් හෝ නොවැවී තිබීමත් මිනිසුන්ගේ කුතුහලය වැඩි කිරීමට තවත් හේතුවක් වී තිබෙනවා. එසේ සිදුව ඇත්තේ කෙසේදැයි කීමට විද්‍යාඥයන් පවා සමත් වී නැහැ. මෙහි පස් නියැදි පවා පරීක්ෂාවට ලක්කොට ඇති අතර ඒ පස්වලද කිසිදු වරදක් නැති බව ඔවුන් සඳහන් කොට තිබුණා. ඒ අවට වැසියන් විශ්වාස කරන්නේ එම කවය වනයේ සිදුවන අද්භූත සිදුවීම්වල කේන්ද්‍රස්ථානය බවයි.

කෙසේ වුවත් මෙතෙක් හොයියා බාචු වනය වෙත ඇතුළුවී කිසිදු බලපෑමක් නොමැතිව පිටතට පැමිණි පුද්ගලයකු පිළිබඳ සඳහන් වී නැහැ. අදටත් ඒ පිළිබඳව විවිධ රටවලින් පැමිණ පර්යේෂණ සිදු කරමින් සිටිනවා.




ශ්‍රීපාද අඩවියේ ගුප්ත ඇත් සොහොන

ශ්‍රී පාද අඩවිය ගුප්ත අබිරහස්වලින් සැඟවී ගිය ස්ථානයකි. එහි නිතිපතා අලුත් යමක් සිදුවෙයි. කලක් හැටන් ශ්‍රී පාද මහා විද්‍යාලයේද ඉන්පසු මස්කෙළ...