Monday, July 16, 2018

එළුවන්ගේ ලේ උරාබොන චුපකාබ්රා Chupacabra ....

 ගුප්ත සත්ව විද්‍යාඥයින්ගේ අවධානය යොමුවුණු චුපකාබ්රා Chupacabra කියන සත්වයා වාසය කරන බවට තොරතුරු ලැබෙන්නේ ලතින් ඇමෙරිකාවෙන්. ඒ හැර ඇමෙරිකා එක්සත් ජනපදයේ පහළ කොටස්වලින් සහ මෙක්සිකෝවෙන් පවා මෙම අද්භූත සත්වයා ගැන තොරතුරු වාර්තා වුණා. ඒත් බොහොමයක් සත්ව විද්‍යාඥයින් හා වනජීවී ආරක්ෂක නිලධාරීන් ප‍්‍රකාශ කරනුයේ මේ සත්වයා ගැන ලැබෙන ආරංචි බොරු බවත්. මේ සතා හුදෙක් ප‍්‍රවාදයක් බවත්ය.

චුපකාබ්රා කියන්නේ කාටද ?
‘චුපකාබ්රා’ කියන්නේ ස්පාඤ්ඤ වචන දෙකකින් සැදුණු නමක්. ස්පාඤ්ඤ බසින් ‘චුපා’ කියලා කියන්නේ උරා බොනවාටයි. ‘කාබ්රා’ කියන්නේ එළුවාටයි. රාත‍්‍රී කාලයේ ඇවිත් එළුවන් සහ ගොවිපළ වෙනත් සතුන් මරා ඔවුන්ගේ ලේ උරා බොන නිසා මෙම අද්භූත සත්වයා හඳුන්වන්නේ ‘චුපකාබ්රා’ කියලයි.

චුපකාබ්රාගේ හැඩරුව
ලතින් ඇමෙරිකානුවන් මෙම සත්වයාට දක්වන්නේ විශාල බියක්. ඒ නිසාම ඇසින් දුටු සාක්ෂි අනුව මේ සත්වයාගේ බාහිර පෙනුම විවිධයි. හැබැයි මේ සත්වයා දුටු හැම කෙනෙක්ම පොදුවේ කියන කරුණු කීපයක්ම තියෙනවා. ඒ අනුවයි මේ සත්වයාගේ පෙනුම තීරණය කර ඇත්තේ. මේ සත්වයා ප‍්‍රමාණය කුඩා වලහෙක් වගෙයි. දිගු වලිගයක් ඇති අතර බෙල්ල පසුපස සිට වලිගය කෙළවර තෙක්ම උල් කටු පිහිටා තියෙනවා උරගයෙක් වගේ. මොහුගේ සම කොළ සහ අළු පාටයි. සිරුර කොරපොතුවලින් පිරිලා. දෙපයින් ගමන් කරන මේ සත්වයාගේ උස අඩි මීටර 1 හෝ 1.2 ක් විතර ඇති. මේ සතාට දෙපයින් යනවා වගේ ම කැන්ගරුවෙක් මෙන් පැන පැන යාමේ හැකියාවකුත් තියෙනවා. එක් වරක් අඩි 20 ක් ඈතට පැනීමට හැකි වූ බව එක් ඇසින් දුටු වාර්තාවක සඳහන්. සමහරුන් කියන විධියට මෙම සත්වයාගේ මුහුණ මනුෂ්‍යයෙකුගේ වගෙයි. ලොකු කළු පාට ඇස් සහිත හිස සිරුරේ ප‍්‍රමාණයට වඩා විශාලයි. තවත් සමහරුන් කියන්නේ මෙම සත්වයාට ඇත්තේ බල්ලකු සමාන මුහුණක් බවයි. දෙකට බෙදුණු දිවක් ද උල් දත් ද ඇති බව තවත් සමහරුන් කියනවා. බියට පත් වූ විට සර්පයකු මෙන් පිඹිනවා. ඒ වගේ ම ඇඟ කිළිපොලා යන තරමේ කෑ මොර දීමක් කරනවා. ඉන්පසු ඌ ගෙන්දගම් ගඳ වැනි සැර අමිහිරි ගඳක් නිකුත් කරමින් ඒ ස්ථානයෙන් පලා යනවා. සමහර වාර්තාවලට අනුව චුපකාබ්රා කෑ මොර දෙන විට උගේ ඇස් දීප්තිමත් වී රතු පැහැයෙන් දිලිසෙන්නට පටන් ගන්නවා. එය දකින්න අය බියෙන් ගල් ගැසෙන බවත් තවත් වාර්තාවල සඳහන් වෙනවා. සමහර වාර්තාවලට අනුව නම් චුපකාබ්රාට වවුලකුගේ මෙන් සමින් සැදුණු පියාපත් යුගලයක් ද තියෙනවා.

අතීත තොරුතුරු
ඇමෙරිකා එක්සත් ජනපදයේ පහළ කෙළවරේ සහ මෙක්සිකෝවෙන් ‘චුපකාබ්රා’ ගැන තොරතුරු ප‍්‍රසිද්ධ වීමට කලින් මුලින්ම ‘චුපකාබ්රා’ ගැන තොරතුරු අසන්ට ලැබුණේ 1990 වසරේදී පමණ පුවර්ටෝ රීකෝ නුවරිනුයි. ඇමෙරිකා එක්සත් ජනපදයේ මේන් නුවර සිට ලතින් ඇමෙරිකාවේ චිලී රාජ්‍යය දක්වාම මේ සත්වයා දුටු බවට සාක්ෂි ලැබී තියෙනවා. චුපකාබ්රා කළ පහරදීමක් සම්බන්ධව මුලින්ම තොරතුරු වාර්තා වුණේ 1995 වසරේ පුවර්ටෝ රීකෝවලිනුයි. මෙම පහරදීමේදී බැටළුවන් 8 දෙනෙක් මරා දමා තිබුණා. ඒ හැම බැටළුවකුගේම පපුව මැද උල් දත් පාරවල් වැනි සිදුරු තුනක් දක්නට ලැබුණා. ඒ වගේම මේ හැම බැටළුවකුගේම සිරුරේ ලේ සම්පූර්ණයෙන්ම ඉවත් වෙලයි තිබුණේ.

මෝකා නුවරට ආ වැම්පයරයා
1995 වසරේ පුවර්ටෝ රීකෝවලින් වාර්තා වූ බැටළු ඝාතනය හා උන්ගේ ලේ උරාබීමේ සිදුවීම ගැන වැඩිදුර සෙවීමේදී ගුප්ත සත්ව විද්‍යාඥයින්ට දැන ගන්න ලැබුණා 1975 වසරේදී මෝකා නම් කුඩා නගරයක සිදුවූ දෙයක්. එම සිදුවීම නම් කර තියෙන්නේ ‘මෝකා වැම්පයර් භීෂණය’ කියලයි. ගොවිපළ ගණනාවකින් වාර්තා වුුණා ඔවුන්ගේ ගොවිපළ සතුන් කිහිප දෙනකුම හිටිහැටියේ අතුරුදන් වී ඇති බව. අන්තිමේ දී මරා දමා තිබී හමු වූ ඒ සතුන්ගේ සිරුරුවලත් ලේ තිබුණේ නැහැ. ඒ සිරුරුවලත් එක හා සමාන දත් පාරවල් දැකිය හැකි වුණා. හරියට වැම්පයරයෙක් ඇවිත් ලේ උරා බීලා වගේ. ඒ නිසයි වැම්පයර් භීෂණය කියලා මේ සිද්ධිය නම් කළේ. ඒත් පසුව හෙළි වී තිබුණා, මෙම සිද්ධිය සාතන් අදහන කල්ලියක් විසින් සිදු කළ බිලි පූජාවක් බව.

චුපකාබ්රා දුටු බවට අලූත්ම වාර්තා
1900 දශකයේ සිටම අද දක්වාම චුපකාබ්රා ගැන විටින් විට අපූරු වාර්තා ලැබී තියෙනවා. ඒවායින් ඇතැම් වාර්තා විශ්වාස කිරීමට අපහසු වුනත් සමහර වාර්තා ගැන එසේ නොවේ. 2004 සිට 2008 දක්වා චුපකාබ්රා සම්බන්ධව ලැබුණු වාර්තා අතුරින් වැදගත් සිදුවීම් කිහිපයකි, මෙහි දැක්වෙන්නේ.

ලෝම හැලූණු කයෝටි නරි
2004 වසරේ ජූලි මාසයේදී සැන් ඇන්තෝනියෝ නම් ගොවිපළ හිමියාගේ ගොවිපළේ සතුන්ට පහර දුන් ලෝම රහිත බල්ලෙක් වැනි සතකුව මරා දමා තිබුණා. පසුව කළ ඞී.එන්.ඒ. පරීක්ෂණවලින් හෙළි වුණා ඒ ලෝම හැළීමේ රෝගයකට මුහුණ දී සිටි කයෝටි නරියෙක් බව. එම වසරේම ඔක්තෝබර් මාසය වන විට මෙම සමේ රෝගයට ගොදුරු වූ ලෝම හැලූණු තවත් කයෝටි නරියන් දෙදෙනෙකුගේ සිරුරු සොයා ගැනුණා.

රුසියාවෙන් චුපකාබ්රා හමුවේ
2006 වසරේ අප‍්‍රියෙල් මාසයේ ‘මොස්නිව්ස්’ පුවත්පතේ පළ වුණා, ප‍්‍රථම වතාවට රුසියාවෙන් චුපකාබ්රා සත්වයකු දුටු බවට වාර්තාවක්. පුවත් පතේ පළ වුණේ 2005 වසරේ සිට මධ්‍යම රුසියාවේ ගොවිපළ සතුන්ට පහර දෙමින් උන්ගේ ලේ උරා බොන සත්වයෙක් ගැන වාර්තාවක්. එක් දිනක රාති‍්‍රයේ ගොවිපළක සිටි කළුකුම් 32 දෙදෙනෙක්ම මරා උන්ගේ සිරුරුවලින් ලේ උරා බී තිබුණා. මේ අතරේ බැටළුවන් 30 දෙනෙක් මරා දමා ඇති බවට අසල්වැසි ගම්මානවලින් ආරංචි ලැබුණා. ඇසින් දුටු සාක්ෂි අනුව 2006 වසරේ මැයි මාසයේදී විශේෂඥයින් පිරිසක් මේ සත්වයා සොයා ප‍්‍රදේශය පීරමින් විශාල ගවේෂණයක් ආරම්භ කළා. ඒත් එය අසාර්ථක වුණා.

දිගු උල් දත් ඇති කෘදන්තයෙක්
2006 වසරේම ඇමෙරිකාවේ මේන් ජනපදයේ ටර්නර්හි මිචෙල් ඕඩොනල් කියා තියෙනවා ඇය පාරේ යමින් සිටියදී නපුරු පෙනුමකින් යුත්, කෘන්තකයකුගේ මෙන් දිගු උල් දත් දෙකක් ඇති නපුරු පෙනුමකින් යුත් සත්වයකු මාර්ගය අසළ මැරී සිටිනු දුටු බව. මේ සත්වයා මිය ගොස් සිටියේ වාහනයක හැපීමෙනි. සතා හරියටම මොකෙක්දැයි පැහැදිලිව හඳුනා ගැනීමට නොහැකි තත්වයක සිටි අතර උගේ ඡායාරූප ලබා ගැනුණා. ඒ අනුව බල්ලෙකු වැනි සතෙක් බව පැහැදිලි වුණා. ඒත් මේ සත්වයා ඒ පළාතේ වෙසෙන බල්ලකු හෝ වෘකයකු නොවන බව තහවුරු වුණා. බැලූ බැල්මට බල්ලකු ලෙස පෙනුණත් ඌ ගවයකුගේ හා බල්ලකුගේ මිශ‍්‍රණයක් වැනියැයි එම වාර්තාවල සඳහන් වෙනවා. මේ සත්වයාගේ මළ සිරුර ගිජුලිහිණියන්ගේ ආහාරයට පත් වීම හේතුවෙන් නිසි ලෙස පරීක්ෂා කිරීමට නොහැකි වී ඇත.

බැටලූවන් 300 ක් මරා දමයි
බැටලූවන් 300 ක් මරා දැමූ බවට තොරතුරු 2007 වසරේ කොලොම්බියාවේ බොයාකා පළාතෙන් වාර්තා වී ඇත. ගොවීන් පිරිසක් විසින් මෙම සත්ව ඝාතනයන් කළ සත්වයෙක් අල්ලා කොලොම්බියා ජාතික සරසවියට භාර දී ඇති නමුත් ඒ පිළිබඳ වැඩි විස්තර වාර්තා නොවේ.

කැනියන්ට හමුවුණේ අළු හිවලෙක්
2007 වසරේ අගෝස්තුවේ කුවේරෝ ටෙක්සාස්හි ෆිලීස් කැනියන් සහ ඇගේ අසල්වැසියන් පිරිසකට කැනියන්ගේ වත්තේ තිබී අමුතු විදියේ සතකුගේ මළ සිරුරක් හමුවුණා. කැනියන් මේ සතාගේ ඡායාරූප ගත්තා. හිස සුරක්ෂිතව ශීතකරණයේ තබා පසුව යොමු කළා ඞී.එන්.ඒ. පරීක්ෂණයකට. කැනියන් කීවේ ඇගේ ගොවිපළේ කුකුළන් මරා උන්ගේ ලේ බී චුපකාබ්රා මේ සත්වයා බවයි. ඒත් 2007 නොවැම්බර් මාසය වෙද්දී ටෙක්සාස් ජනපද සරසවිය විසින් සිදුකළ ඞී.එක්.ඒ. පරීක්ෂණවලින් ඔප්පු වුණා කැනියන්ගේ චුපකාබ්රා අන් කවරකුවත් නොව තවත් ලොම් හැලී යාමේ රෝගයකට ගොදුරු වූ කයෝටි නරියෙක් බව.

චුපකාබ්රා පිලිපීනයෙනුත් ?
ලේ උරාබොන චුපකාබ්රාවකු ගැන පිලිපීනයෙනුත් වාර්තා වෙනවා. ඒ 2008 වසරේ ජනවාරි 11 වැනිදාය්. මේ පිළිබඳ වාර්තා ලැබෙන්නේ පිලිපීනයේ කැපීස් පළාතෙනුයි. කැපීස් පළාතේ වැසියන් දැක තියෙනවා, රාතී‍්‍ර කාලයේ ඔවුන්ගේ ගොවිපළවලට ඇවිත් කකුළන්ට පහර දී මරා දමා ලේ බොන බල්ලෙකු වැනි සත්වයෙක්.


Tuesday, July 10, 2018

උතුරු කොරියානු නායකයාගේ දුවන ආරක්ෂක භටයෝ

ලිබියාවේ හිටපු ආඥාපති ජනාධිපති මුවම්මර් ගඩාෆි ඔහුගේ අපූරු කල්කිරියාවන් නිසා ලොව පුරා පතළ වූවෙකි. එකල ඔහු යන යන තැන පිරිවරා සිටියේ සුරූපී ආරක්ෂක සෙබළියන්ය. ගිනි අවි අත දරා ගඩාෆි වෙනුවෙන් මැරෙන්නට වුව පෙරට ආ එම සෙබළියන් බටහිර මාධ්‍ය විසින් හඳුන්වනු ලැබුවේ ගඩාෆිගේ ‘ඇමේසන් බළකාය’ ලෙසිනි. ලිබියානු නායකයා යනඑන සැම තැන එම සුරූපී ආරක්ෂක සෙබළියෝ පහළොස් දෙනෙක් කැටුව යනු ලැබූහ. ගඩාෆිගේ ආරක්ෂක බළකායට එක්වීමට ඔවුන් ලද මූලිකම සුදුසුකමක් වූයේ අනිවාර්යයෙන්ම කන්‍යාවන් වීමය. එම කාන්තා බළකායේ සෙබළියක් වරක් සිය නායකයාට එල්ලවූ වෙඩි ප්‍රහාරයකින් ඔහු බේරා ගැනීම සඳහා සිය සිරුරින් ඔහු මුවා කර ගනිමින් ප්‍රහාරයට මුහුණ දී තුවාල ලැබ ලොව පුරා අවධානයට ලක් වූවාය.
ගඩාෆිගෙන් පසු මෙවර ලෝකය පුරා අවධානයට ලක්ව ඇත්තේ උතුරු කොරියානු නායක කිම් ජොංග් උන් ගේ අපූරු පුද්ගල ආරක්ෂක බළකායයි. ඇමෙරිකානු ජනාධිපතිවරයා සමඟ ඓතිහාසික ගිවිසුම අස්සන් කිරීම සඳහා සිංගප්පූරුවට පැමිණි කිම් සෑම තැනම ආවේ ගියේ මේ අපූරු ආරක්ෂකයන් පිරිවරා ගෙනය. කිම් සිය සුඛෝපභෝගී ලිමොසින් බෙන්ස් වර්ගයේ මෝටර් රථයෙන් යද්දී ආරක්ෂක භටයෝ ‘යූ’හැඩයේ ආරක්ෂක වළල්ලක් සෑදී රියේ ගමන සමඟ දිව යෑම පසුගිය දිනවල සිංගප්පූරු ජනතාවගේ නෙතට අපූරු දසුනක් වූවාක් මෙන්ම මාධ්‍යට කතාබහට මාතෘකාවක් එක් කළේය. ඒ ආරක්ෂක භටයන් ගැන තොරතුරු හෙළි කළ බටහිර මාධ්‍ය ඔවුන් හැඳින්වූයේ කිම් ගේ jogging guardiance ලෙසිනි. මේ දුවන ආරක්ෂකයන් ගැන ලෝක මාධ්‍යය පළමුවෙන්ම අවධානය යොමු කළේ පසුගිය අප්‍රේල් මාසයේ පැවැති කොරියානු නායකයන් දෙපළගේ පළමු මුණ ගැසීමේ අවස්ථාවේදීය. එම හමුවෙන් පසු අන්තර්ජාලයට එක්වූ වීඩියෝ පටයකින් මේ දුවන ආරක්ෂකයන් පළමු වරට ලොවට හෙළිවිය. මෙවර ඔහු වටා දුවයන ආරක්ෂකයන් ගැන පමණක් නොව කිම් සිංගප්පූරුවට ආ දා සිට කළ කී දෑ දෙසද ලෝකයා බලා සිටියේ දැඩි කුතුහලයකිනි.
කිම් උතුරු කොරියාවේ නායකයා වූ දා සිට සිය මවු බිමෙන් තරමක දුර ඈතකට ගමන් කළ පළමු අවස්ථාව මෙය වූයේය. මීට පෙර ඔහු දකුණු කොරියාවට හා චීනයට ගියේ දුම්රියෙනි. ඇමෙරිකානු ජනාධිපති හා කිම් මුණ ගැසෙන දිනයේ කිම්ගේ සම්ප්‍රාප්තියට පෙර ගුවන් යානා දෙකක් සිංගප්පූරුවට පැමිණියේය. ඉන් එක් ගුවන් යානයකින් පැමිණියේ කළු පැහැ කලිසම් කෝට් හැඳ නිල් හා සුදු ඉරි ටයි පටි පැලැඳි දුවන ආරක්ෂකයන් ඇතුළු කිම්ගේ සමීප ආරක්ෂක බළකා සාමාජිකයන්ය. එම සමීප ආරක්ෂක බළකායට නිලධාරීහූ 300කට ආසන්න සංඛ්‍යාවක් අයත් වෙති. ඒ අතරින් කිම් වටා දුවන ආරක්ෂක බළකාය නිලධාරීන් දොළොස්දෙනකුගෙන් සමන්විතය. මේ ආරක්ෂකයෝ වට තුනකින් යුතු ආරක්ෂක වළල්ලක් ලෙස ක්‍රියාත්මක වෙති. පැය 24 පුරා කිම්ගේ ආරක්ෂාවට කැපව සිටින මේ ආරක්ෂකයෝ ඔහුගේ විශ්වාසවන්තම නිලධාරීහුය. කිම් වටා ඉතා ළඟින් සිටින මේ නිලධාරීන් තෝරා ගනු ලබන්නේ කොරියානු මහජන හමුදා සාමාජිකයන් අතරෙනි. මේ තෝරා ගැනීම ද අපූරුය. ඔවුන් කිම්ගේ උසට සමාන උසකින් යුක්ත විය යුතුය. එසේම ඔවුන් කිම්ගේ පරම්පරාවේ හෝ උතුරු කොරියානු ප්‍රභූ පවුල්වල සාමාජිකයන් විය යුතුය. මේ සියල්ලටම වඩා ඔවුන් මනා ශරීර සෞඛ්‍යයෙන් යුක්ත වීම ද දෘශ්‍ය හෝ ශ්‍රවණ ආබාධවලින් තොර වීමද මුහුණේ විශේෂ කැළැල් හා ලපවලින් තොරවීම ද වැදගත්වේ. ඒ අතරම ඔවුන් මනා ලෙස ගිනි අවි හැසිරවිමේ කලාව හා ආත්මාරක්ෂක සටන් කලාව ප්‍රගුණ කළ පුද්ගලයන් විය යුතුය. මේ සියලු සුදුසුකම් සපුරාලීමෙන් පසු කොරියානු බුද්ධි අංශ අදාළ නිලධාරියාගේ පවුල් පසුබිම ගැන පුළුල් පරීක්ෂණයක් සිදු කරයි. කිම්ගේ දුවන ආරක්ෂකයන් ලෙස තෝරා ගන්නේ පරම්පරා දෙකක් ආපස්සට ඔවුන් ගැන තොරතුරු සොයා බැලීමෙන් පසුවය. බඳවා ගැනීමෙන් පසු ඔවුහු ආරක්ෂාව පිළිබඳ විශේෂ පුහුණුවකට යොමු කරනු ලබති. මේ සියල්ලටම වඩා උතුරු කොරියානු නායකයාගේ දුවන ආරක්ෂකයන්ගේ විශේෂත්වය වන්නේ ඔවුන් සතු නිරීක්ෂණ හැකියාවයි. කිම් වටා සිටිමින් අංශක 360ක වළල්ලක් ලෙස ඔහුට ආරක්ෂාව සපයන මේ ආරක්ෂකයෝ ඔහුට ඉදිරිපසින් හා දෙපසින්ද පිටුපසින්ද සිටිති. ඔහු කුමක් කරන්නේද යන්නේ කොහේද? නවතින්නේ කොහේද? ඒ සැම තැනකටම ඔවුහු ඇස ගසාගෙන සිටිති. උතුරු කොරියානු නායකයා සමීපයේ ගිනි අවියක් තබා ගෙන සිටිය හැකි එකම කණ්ඩායම වන්නේ මේ ආරක්ෂකයන් පමණි.
කිම්ගේ ආරක්ෂාවට බඳවා ගැනීමෙන් පසු ඔවුන්ට අංකයක් සහිත හැඳුනුම්පතක් ලැබෙන අතර ඒ හැර ඔහුගේ සියලු පෞද්ගලික වාර්තා මකා දමනු ලැබේ. ඔහුට ඉන්පසු පවුලේ සාමාජිකයන් මුණ ගැසිමද තහනම්ය. කෙසේ වුව දුවන ආරක්ෂකයන් ලෙස බඳවා ගන්නේ ද එක් පවුලකින් එක් සාමාජිකයකු පමණි.
දුවන ආරක්ෂකයන් බටහිර පන්නයේ ඇඳුමින් සැරසෙද්දී කිම් ගේ රියැදුරන් සුක්කානම පහසුවෙන් කරකැවීමට හැකිවන පරිදි කපු හෝ සමින් කළ අත්වැසුම් හා පණිවුඩ හුවමාරුව සඳහා කනේ උපකරණ පැලැඳියි යුතුය. උතුරු කොරියානු නායකයා දැඩිව දුම් පානය කරන්නෙකි. ඔහු ඉල්ලූ පමණින් දීම සඳහා මේ ආරක්ෂකයෝ දුම්වැටි හා මත්පැන් ළඟ තබාගෙන සිටිති. ඒ සියල්ල ඔහුට ලබා දෙන්නේ දැඩි පරීක්ෂාවකින් පසුවය. එසේම ඔහුගේ දුරකථන ජාලය හසුරුවන්නේද ‍මේ ආරක්ෂකයන්ය.
කිම් සිය ආරක්ෂාව සඳහා මෙලෙස ආරක්ෂක නිලධාරීන් හා විවිධ උපක්‍රම යොදන්නේ මෙවන් සංචාරයකදී ඔහු ඝාතනයට ලක් වීමට ඉඩ ඇතැයි යන බිය නිසාය. කෙතරම් ආරක්ෂක විධිවිධාන යෙදුවද ඔවුන් තවමත් ආරක්ෂකයන් හඳුනාගැනීම සඳහා විශේෂිත වූ නිල පදක්කම් උරයේ පැලැඳීම, රහස් කේත අංක හා මුර පද භාවිතය වැනි ප්‍රාථමික මට්ටමේ හඳුනා ගැනීමේ ක්‍රම භාවිත කරන බව බටහිර මාධ්‍යය පවසයි.
කිම් සිංගප්පූරුවට පා තැබීමට පෙර පැමිණි ගුවන් යානා දෙ‍කෙන් එක් ගුවන් යානයකින් මේ ආරක්ෂක නිලධාරීන් හා පෞද්ගලික වෛද්‍ය කණ්ඩායම පැමිණෙද්දී අනෙකේ ඔහුගේ ලිමොසින් බෙන්ස් රථයත් ජංගම වැසිකිළියත් රැගෙන ආ බව මාධ්‍ය වාර්තා කළේය. එපමණක් නොවේ උතුරු කොරියානු නායකයාගේ සියලු අපද්‍රව්‍ය බිඳකුඳු විදෙස් බිමක නො‍හෙළා ආපසු රැගෙන යෑමටද ඔවුහූ වගබලා ගත්හ.
ලිබියාවේ හිටපු නායක ගඩාෆි බොහෝ අවස්ථාවලදී විදෙස් සංචාරයන්හිදී ඒ රටවලින් ඔහුගේ නවාතැන් සඳහා සපයන සු‍ඛෝපභෝගී හෝටලවල ලැගුම් නොගෙන ඒ ආසන්න බිමක තමා රැගෙන යන බෙඩුවින් කූඩාරමක් අටවා නවාතැන් ගන්නා බව ප්‍රකටය. එහිදී ඔහු වටා සිටිමින් ආරක්ෂාව සැපයුමේ සෙබළියන්ය. උතුරු කොරියානු නායකයාගේ ද ප්‍රාණ බිය කෙතරම් ද යත් ඔහු ඇමෙරිකානු ජනාධිපතිවරයා සමඟ එක්ව ගිවිසුම අත්සන් කරද්දී එහි තබා තිබූ පෑනෙන් අස්සන් කිරීමට මැළිකමක් දැක්වූ බව මාධ්‍ය වාර්තා කර තිබිණි. නායක දෙපළ අත්සන් තබන මේසයේ අසුන් ගැනිමට පෙර පැමිණි කිම්ගේ ආරක්ෂකයකු කිම්ට අස්සන් කිරීම සඳහා තබා තිබූ පෑන අත් මේස් දැමූ දෑතින් ගෙන රෙදි කැබැල්ලකින් හොඳින් පිස දමා ආපසු තබනු බටහිර මාධ්‍ය වාර්තාකරුවකුගේ වීඩියෝ පටයකට නැංවී තිබිණ. එම පෑනෙන් අත්සන් කිරීමට පැකිළෙන කිම් දුටු ඔහුගේ සොහොයුරිය සිය කබායේ වූ පෑන කිම් අතට දුන්නාය. උතුරු කොරියානු නායකයාගේ විශ්වාසවන්තම තැනැත්තිය වන්නේ සොහොයුරිය වන කිම් යෝ ජොංග් ය‍.
කිම් කෙතරම් ජීවිතය ගැන බියද යත් තමාගේ නියම වයස හෝ දරුවන් සංඛ්‍යාව යනාදී සියලු තොරතුරු වසන් කරයි. දැඩිව මිථ්‍යා මතයන්හි එල්බ ගත් කිම් පවුල නවයේ ඉලක්කම සිය වාසනාවන්ත අංකය ලෙස සලකයි. කිම් සිංගප්පූරුවට පැමිණියේ තෙවනුව පැමිණි චීන ගුවන් සේවයේ යානයකිනි. ගමන් ගත්තේ ආරක්ෂක රථ විස්සක් පමණ පිරිවරා ගෙනය. සිංගප්පූරුව ඇමෙරිකානු ජනාධිපතිට දුන්නාටත් වඩා ආරක්ෂාවක් කිම්ට දුන්නේ උතුරු කොරියාව විසින් කළ ඉල්ලීම අනුවය. මේ සියල්ල ජිවිතය ගැන ඇති බිය නිසාය. කිම්ගේ පියා ද මෙලෙසම ආරක්ෂකයන් තබා ගත්තෙකි. ඔහු ගුවන් ගමන්වලට ද දැඩි බියක් දැක්වූවෙකි. උතුරු කොරියාව යනු ලොව විශාලතම හමුදාව නඩත්තු කරන රටය. කිම් පවුලේ ආරක්ෂාව සඳහා නිලධාරීන් යොදා ගන්නේ හමුදාවේ එලයිට් යුනිට් නමැති බළකායෙනි. මරණ බිය කෙතරම් ද යත් ඒ සියලු බළකායන් ස්ථානගත කර ඇත්තේ ද කිම් පවුලේ වාසස්ථාන අසලය.

උපුටාගත් ලිපියක් ඇසුරෙනි

ගුණපාල මලලසේකර





උපත 1899 නොවැම්බර් 8
මාලමුල්ල,පානදුර , බ්‍රිතාන්‍ය ලංකාව
මරණය 23 අප්‍රේල් 1973 (වයස 73)
කොළඹ
ජාතිකත්වය ශ්‍රී ලංකාව ශ්‍රී ලංකික
වාර්ගිකත්වය සිංහල
උගත් ශාස්ත්‍රාලය ශාන්ත ජෝන් විද්‍යාලය,පානදුර, ලන්ඩන් විශ්වවිද්‍යාලය
වෘත්තිය ශාස්ත්‍රීය,රාජ්‍යතාන්ත්‍රික
ආගම ථේරවාද බෞද්ධ

මහාචාර්ය ගුණපාල මලලසේකර ( ගුණපාල පියසේන මලලසේකර ) ( 1899 නොවැම්බර් 8 - 1973 අප්‍රේල් 23 ) යනු ශ්‍රී ලංකාවෙන් බිහිවු විශිෂ්ට ගණයේ උගතෙක් හා රාජ්‍යතාන්ත්‍රිකයෙක්ය. එතුමා රුසියාවේ ප්‍රථම ශ්‍රී ලංකා තානාපතිද කැනඩාවේ හා මහා බ්‍රිතාන්‍යයේ ප්‍රථම ශ්‍රී ලංකා මහා කොමසාරිස්ද එමෙන්ම එක්සත් ජාතීන්ගේ ප්‍රථම ශ්‍රී ලංකා නිත්‍ය නියෝජිතද විය. එතුමා විවිධ ගෞරව පදවිවලින් පිදුම් ලැබිය. මලලසේකර ඉංග්‍රිසි - සිංහල ශබ්දකෝෂය මෙතුමාගේ සම්පාදනයකි.

ජෝර්ජ් පීරිස් මලලසේකර ලෙස 1899 නොවැම්බර් 8 වන දින පානදුර මාලමුල්ලහිදි උපත ලැබීය. මෙතුමාගේ පියා එවකට ප්‍රසිද්ධ ආයුර්වේද වෛද්‍යවරයෙකු වු වෛද්‍ය M.S.පීරිස් මලලසේකරය.1907 සිට 1917 දක්වා පානදුර ශාන්ත ජෝන් විද්‍යාලයෙන් අධ්‍යාපනය ලැබු එතුමා පසුව වෛද්‍යවරයෙක් විම සදහා කොළඹ ලංකා වෛද්‍යවිද්‍යාලයට ඇතුලත් විය එහෙත් පියාගේ වියෝවය නිසා එතුමාගේ වෛද්‍ය අධ්‍යාපනය අඩාලවීය. කෙසෙනමුත් පසුව ලන්ඩන් විශ්වවිද්‍යාලයෙන් පළමු පන්තියේ ශාස්ත්‍රවේදි උපාධියක් ලබාගැනිමට එතුමාට හැකිවිය.

අනගාරික ධර්මපාල තුමා විසින් බෞද්ධ පුනරුදය සඳහා ආර්ය සිංහල නම් භාවිතා කිරිමේ ප්‍රතිපත්තිය යටතේ එතුමාගේ ඉංගි‍්‍රසි නම වු ජෝර්ජ් පීරිස් මලලසේකර වෙනුවට ගුණපාල පියසේන මලලසේකර යන නම පසුව භාවිතා කෙරිණි. ශාස්ත්‍රවේදි උපාධියෙන් පසුව ආනන්ද විද්‍යාලයට පළමු පත්වීම ලැබ පැමිණි ගුණපාල මලලසේකර මහතා එවකට ප්‍රධාන විදුහල්පති වූ පී.ද.එස්.කුලරත්න මහතා යටතේ ගුරුවරයකු ලෙස කටයුතු කලේය.පසුව ඉතා ඉක්මනින්ම ආනන්ද විද්‍යාලයේ උප විදුහල්පති සහ වැඩ බලන විදුහල්පති යන තනතුරුවලට ද පත්විමට එතුමාට හැකිවිය.පසුව නැවතත් එතුමාගේ වැඩිදුර අධ්‍යාපනය සදහා ලන්ඩන් බලා පිටත් විය.1926 දි නැවතත් ශ්‍රී ලංකාවට පැමිණි එතුමා අලුතින් ආරම්භ කෙරුණු කොළඹ නාලන්දා විද්‍යාලයේ විදුහල්පති ලෙස පත්විම් ලැබීය.මහාචාර්ය ගුණපාල මලලසේකර මෑතිතුමා සිහිවනු වස් නාලන්දා විද්‍යාලයයේ ශිෂ්‍ය රැස්වීම් ශාලාව මලලසේකර රඟහල නමින් නම් කර ඇත.

ගුණපාල මලලසේකර මැතිතුමා

ගුණපාල මලලසේකර මැතිතුමා පිළිබඳව වැදගත් කරුණු,

අධ්‍යාපනය - පානදුර ශාන්ත ජෝන් විද්‍යාලයෙන්.

උසස් අධ්‍යාපනය - ලන්ඩන් විශ්වවිද්‍යාලයෙන්,
1. B. A උපාධිය (B. A උපාධිය ගත් ලාබාලතමයා)
2. ශාස්ත්‍රපති උපාධිය (M. A)
3. ආචාර්ය උපාධිය (PhD)

හෙබවූ තනතුරු -
සටහන:-
මේවා අතරින් දරුවාට මතක තබා ගැනීමට පහසු කරුණු 3 ක් පමණක් සටහන් පොතට ඇතුලත් කරන්න.
1. කොළඹ ආනන්ද විද්‍යාලයේ උපගුරු තනතුර.
2. කොළඹ නාලන්දා විද්‍යාලයේ විදුහල්පති ධූරය.
3. කොළඹ විශ්වවිද්‍යාලයේ පෙරදිග භාෂා අංශභාර ධූරය.
4. පේරාදෙණිය විශ්වවිද්‍යාලයේ පාලි භාෂාව පිළිබඳ මහාචාර්ය ධූරය.
5. සමස්ථලංකා බෞද්ධ මහා සම්මේලනයේ සභාපති ධූරය.
6. රුසියාවේ සහ එක්සත් රාජධානියේ ශ්‍රී ලංකා තානාපති ධූරය.
7. එක්සත් ජාතීන්ගේ සංවිධානයේ ශ්‍රී ලංකා නියෝජිත ධූරය.
8. උසස් අධ්‍යාපන කොමිෂන් සභාවේ සභාපති ධූරය.
9. 2500 බුද්ධ ජයන්තිය නිමිත්තෙන් ඇරඹි බෞද්ධ විශ්වකෝෂය ලිවීමේ කාර්යයෙහි ප්‍රධාන කර්තෘ ධූරය.

කැපී පෙනෙන චරිත ලක්ෂණ හා ගත හැකි ආදර්ශ -
1. ආගන්තුක සත්කාරය.
2. ප්‍රිය වචන කතා කිරීම.
3. පාණ්ඩිත්‍ය.
4. අනතිමානී බව.
5. චාම් සරල දිවි පැවැත්ම.
6. දුක් දොම්නස් මැද වූවත් කම්පා නොවී ප්‍රබෝධමත්ව දිවි ගෙවීම.
7. සෑම කටයුත්තකදීම මධ්‍යම ප්‍රතිපදාව අනුගමනය කිරීම.
8. විපතේදී දිරිමත් වීම හා සැපතේදී උදම් නොවීම.
9. බෞද්ධ සිරිත් විරිත් අගය කිරීම.

කළ සේවය -
1. පාලි සංඥානාම අකාරාදිය, ලංකාවේ පාලි සාහිත්‍ය ආදී පොත් රචනා කිරීම.
2. මලලසේකර ඉංග්‍රීසි - සිංහල ශබ්දකෝෂය රචනා කිරීම.
3. බුදුදහම ලෝ පුරා ව්‍යාප්ත කිරීමට කටයුතු කිරීම.

වියෝව - 1973 මැයි 23

Monday, June 18, 2018

රුසියානු නායකයින්ගේ "තට්ටය - කොණ්ඩය" න්‍යාය

වසර 200 කට ආසන්න කාලයක් තිස්සේ සිදු වෙමින් පවතින බැවින් රුසියාවේ ජනතාව අතර විහිළුවක් ලෙස මෙය සැලකේ. එමෙන්ම රුසියානු නායකයින්ගේ "තට්ටය - කොණ්ඩය" න්‍යාය යනුවෙන් ව්‍යවහාර වෙයි.

1825 දී රාජකීය (සාර්) පළමුවන නිකලස් රජුගේ පාලන සමයේ සිට සෑම රුසියානු නායකයකුම තට්ටයකින් (නැතහොත් තට්ටය පෑදෙමින්) හෝ හිසකෙස් වලින් පිරුණු හිසකින් සමන්විත වූහ.


"ඉතිං මොකද? ඒක එච්චර අමුතු දෙයක්ද? රටක ඕනෑම නායකයෙකුට හිසකෙස් තිබීමට හෝ නොතිබීමට ඉඩ ඇත." යනුවෙන් කෙනෙකුට සිතෙන්නට පිළිවන. නමුත් මෙය මෙතරම් සිත්ගන්නා සුලු වන්නේ, ආසන්න නායකයින් දෙපළක් අතර තට්ටය සහ කොණ්ඩය යන තත්ත්වය දෝලනය වන බැවිණි. වෙනත් අයුරකින් කිවහොත්, එක් නායකයෙක් තට්ට හිසක් සහිත වන විට ඔහුගෙන් පසුව පත්වන නායකයා පිරුණු හිසකෙසින් සමන්විත වෙයි. පිරුණු හිසකෙසින් සමන්විත නායකයෙකුගෙන් පසුව පත්වන්නේ තට්ට හිසක් සහිත නායකයෙකි.

මෙම සංසිද්ධිය ආරම්භ වූයේ 1825 දී, තට්ට හිසක් සහිත පළමුවන නිකලස් රජුගේ පාලන සමය සමඟිනි. ඔහුගේ පියා වූ පළමුවන ඇලෙක්සැන්ඩර් රජුද තට්ට හිසක් සහිත වූ බැවින් මෙම න්‍යාය ආරම්භ වන්නේ එතැන් සිටය. පළමුවන නිකලස් රජුගේ අනුප්‍රාප්තිකයා වූ දෙවන ඇලෙක්සැන්ඩර් රජුට පූර්ණ හිසකෙස් සහිත හිසක් තිබිණි. ඔහුට පසුව පත්වූ තුන්වන ඇලෙක්සැන්ඩර් රජුට තිබුණේ තට්ටය පෑදුන හිසකි.

මෙම අතිශය පුදුම සහගත රටාව සියවස් දෙකක් තිස්සේ රොමනොව් පාලන සමය, සෝවියට් පාලන සමය පසුකර වත්මන් නායකයින් දක්වාම දිගටම පවතියි. දැන් අපි පුටින්ගේ අනුප්‍රාප්තිකයා තව දුරටත් මෙම විහිළුව ඉදිරියට රැගෙන යන්නේදැයි බලා සිටිමු.



අයින්ස්ටයින්ගේ ප්‍රහේළිකාව


අයින්ස්ටයින් මෙම ප්‍රහේළිකාව මේ ශතවර්ෂය තුලදී නිර්මාණය කල අතර ලෝකයේ 98% ක් දෙනෙකුටම එය විසඳිය නොහැකි බව ඔහු පැවසීය.

විස්තරය:
විවිධ වර්ණ 5 ක නිවාස 5 ක් ඇත.
සෑම නිවසකම වෙනස් ජාතියකට අයත් පුද්ගලයකු ජීවත් වේ.
මෙම නිවෙස් පහේම හිමිකරුවෝ එකිනෙකට වෙනස් වර්ගයේ බීමක් පානය කරති; එකිනෙකට වෙනස් වර්ගයේ දුම් පානය කරති; එකිනෙකට වෙනස් වර්ගයේ සුරතල් සතුන් ඇති කරති.
කිසිදු හිමිකරුවෙක් වෙනත් හිමිකරුවෙකුගේ වර්ගයේ බීමක් පානය නොකරයි; වෙනත් හිමිකරුවෙකුගේ වර්ගයේ දුම් පානය නොකරයි; වෙනත් හිමිකරුවෙකුගේ වර්ගයේ සුරතල් සතෙකු ඇති නොකරයි.


ප්‍රහේලිකාව: මාළුවෙකු ඇති කරන්නේ කවුද?

ඉඟි:
බ්‍රිතාන්‍ය ජාතිකයා රතු පැහැති නිවසෙහි ජීවත් වේ.
ස්වීඩන් ජාතිකයාගේ සුරතල් සතා බල්ලා වෙයි.
ඩෙන්මාර්ක් ජාතිකයා තේ පානය කරයි.
කොළ පැහැති නිවස සුදු පැහැති ​​නිවසට වම් පසින් පිහිටා ඇත.
කොළ පැහැති නිවසේ හිමිකරු කෝපි පානය කරයි.
'පෝල් මෝල්' දුම් පානය කරන්නා කුරුල්ලෙකු ඇති කරයි.
කහ පැහැති නිවසේ හිමිකරු 'ඩන්හිල්' දුම් පානය කරයි.
මැදින් පිහිටි නිවසේ හිමිකරු කිරි පානය කරයි.
නෝර්වේජියානු ජාතිකයා පළමු නිවසෙහි ජීවත් වෙයි.
'බ්ලෙන්ඩ්' දුම් පානය කරන මිනිසා බළලෙකු ඇති කරන තැනැත්තාට සමීපව ජීවත් වේ.
අශ්වයෙකු ඇති කරන මිනිසා 'ඩන්හිල්' දුම් පානය කරන මිනිසා ආසන්නයේ ජීවත් වෙයි.
'බ්ලූ මාස්ටර්' දුම් බොන තැනැත්තා බියර් පානය කරයි.
ජර්මන් ජාතිකයා 'ප්‍රින්ස්' දුම් පානය කරයි.
නෝර්වේජියානු ජාතිකයා නිල් පැහැති නිවස අසල ජීවත් වෙයි.
'බ්ලෙන්ඩ්' දුම් පානය කරන මිනිසා, ජලය පානය කරන මිනිසාට ආසන්නයෙන් ජීවත් වෙයි.

Tuesday, June 12, 2018

ලොව ඇති භයානකම දූපත් වලින් එකක් quiemada grande...

ලොව ඇති ඇතැම් දූපත් මිනිසුනට ජීවත් වීමට දුෂ්කර වූත් ඇතැම් කරුණු කාරනා නිසා ජීවත්වීමට අපහසු සහ මිනිස් වාසයට නුසුදුසු ස්ථාන වනවා ඒ අතර මේ කියනා දූපතත් එවන් මිනිස් වාසයට නුසුදුසු වූ මිනිසුන්ට මරණය ගෙන දෙන දූපතක් quien mato grand නොහොත් "සර්ප දූපත"යි මෙය බ්‍රසීල රජයට අයත් දූපතකි..මෙහි සර්පයින් වර්ග 4000 කට වඩා ජීවත් වන බව සදහන් වනවා,එමෙන්ම ගණන් බැලීම් අනුව වර්ග මීටරයකට 1-5 අතර විසකුරු සර්පයන් සිටින අතර ඔබට අඩි තුනක්වත් ජීවිතය බේරාගෙන ඇවිද යාම අපහසු වෙනවාට සැක නැත.. මෙහි තබන අඩියක් අඩියක් පාසා සර්පයින් ඔබට පෑගෙන්නට ඉඩ තිබෙනවා .මෙහි විසකුරු සර්පයින් බොහෝ රාශියකට නිවහනකි,ලෝකයේ විශකුරුම සර්පයා වන Golden lanc head නම් සර්ප විශේෂයද මෙහි ජීවත් වන බව සදහන් ,,


මෙම දූපත අවුරුදු 11000 පැරණි බවත් සදහන් වනවා,ඒ වගේම මෙහි සිටින සර්ප ඝහණය දිනෙන් දින සීඝ්‍රයෙන් වැඩි වන බවත් පරීක්ෂකයන් සදහන් කරනවා.වාර්තා වලට අනුව මෙම දූපත් වනයට පැමිනෙන අයගෙන් 90% ම මරණයට පත්වීමට ඇති ප්‍රවණතාවක් පවතිනවා.එක් මසුන් මරන්නකු මෙම දූපතට කෙසෙල් සොයා පැමිණ නැවත යන අවස්ථාවේ සර්ප ප්‍රහාරයකින් ලේ විලක් මැද මරු දැක පසුව සිරුර හමු වූ බව සදහන් තවද මෙහි ස්තාපිතව ඇති ප්‍රදීපාගාරයේ අවසාන සේවකයාද ඔහුගේ පවුලේ උදවියද සමග මීට වසර බොහෝ ගණනාවකට පෙර එනම් 1909 මරුමුවට පත්ව ඇත්තේ සර්ප ප්‍රහාරයකින් බවත් සදහන් ඇතැම් වැසියන් අතර කතා පුවත් වල සදහන්.දැනට මෙම දූපතට ඇතුලු වීමට හැකියාව පවතින්නේ විශේෂ පරීක්ෂණ කරන විද්‍යාඥයින් හට සහ බ්‍රසීල නාවුක හමුදාවට පමනයි





Friday, June 8, 2018

සාර්ඩිනියානු සිනහව

වසර දහස් ගණනකට පෙර සාර්ඩිනියා දිවයිනෙහි වාසය කළ ෆිනීෂියානු ජනපදිකයන් මියයමින් සිටින පුද්ගලයන්ගේ මුහුණු සිනාගන්වන ආකාරය දැනසිටියහ.

ක්‍රිස්තු පූර්ව අටවන සියවස වනවිට සුප්‍රසිද්ධ කවියෙකු වූ හෝමර් විසින් risus sardonicus යන යෙදුම ඔහුගේ නිර්මාණ තුලින් අඳුන්වා දී තිබුණි. මෙහි සරල තේරුම නම් "සාර්ඩිනියානු සිනහව" යන්නයි. වෛද්‍ය විද්‍යාවට අනුව, මරණයට පත්වන පුද්ගලයෙකුගේ මුහුණේ මාංශ පේශී වල ඇතිවන අනිච්ඡානුග ක්‍රියාවක් නිසා මෙම තත්ත්වය ඇතිවේ. එබැවින් මළ සිරුරේ මුහුණ සිනහසෙන ආකාරයක් පෙන්වයි. මෙම යෙදුමට මුලික වන්නේද සාර්ඩිනියා දුපතයි. හෝමර් මෙම යෙදුම නිර්මාණය කළේ සාර්ඩිනියා දුපතේ සිදුකලා යැයි පැවසෙන චාරිත්‍රානුකූල ඝාතන විස්තර කිරීම සඳහාය.


දැන් විද්‍යාඥයන් පවසන්නේ පුරාණ මුහුදු වෙළඳුන් විසින් වසර 2,800 කට පමණ ඉහතදී මළ සිරුරක බිහිසුනු සිනහවක් නිර්මාණය කිරීම සඳහා ශාඛයකින් ලබාගන්නා විෂ යුෂක් උපයෝගී කරගත් බවයි. ඔවුන්ගේ නව අධ්‍යයනයට අනුව, තවදුරටත් තමන්ගේ රැකවරනය සලසා ගැනීමට නොහැකි වූ වයෝවෘද පුද්ගලයන්ට සහ අපරාධකරුවන්ට සාර්ඩිනියාවේ වැවෙන ශාඛයක විෂ යුෂක් බීමට ලබාදෙන ලදි. ඉන්පසුව හෙළකින් පහළට තල්ලුකර දැමීම හෝ මියයන තෙක් පහරදීම සිදුකරයි.

සියවස් ගණනාවක් පුරා ශාඛයේ අනන්‍යතාව අභිරහසක් වී තිබූ නමුත්, අධ්‍යයනයේ මුළිකයා වන ජියෝවානි ඇපෙන්ඩිනෝ සහ ඔහුගේ සගයන් පවසන පරිදි මියයන මොහොතේ අද්භූත සිනහවක් ගෙන දෙන මෙම ශාඛය හෙම්ලොක් වෝටර්-ඩ්‍රොප්වර්ට් (විද්‍යාත්මක නාමය Oenanthe crocata) නම් වෙයි. සුදු පැහැති මල් දරණ ශාකයක් වන මෙය වර්තමානයේ ඉතාලියට අයත් සාර්ඩිනියා දුපතේ ජලාශ්‍රිතව වැඩේ. පෙනුම සැල්දිරි ශාඛයක ආකාරය ගනී.

මීට දශකයකට පමණ පෙර, සාර්ඩිනියානු එඬේරෙකු යම් ශාඛයක් අහාරයට ගෙන සියදිවි හානිකර ගැනීමත්, මළ සිරුරේ මුහුණ සිනහසෙන ආකාරකින් තිබීමත් මෙම අධ්‍යයනයට මූලික විය.

සාමාන්‍යයෙන් විෂ සහිත ශාඛ තිත්ත හෝ කටුක රසැති වෙයි. නැතහොත් වෙනත් යම් ආකාරයකින් මිනිසුන් විකර්ශනය කරයි. නමුත් මාරාන්තික හෙම්ලොක් වෝටර්-ඩ්‍රොප්වර්ට් ශාඛයේ කඳෙහි සහ පත්‍රවල ඇති ප්‍රසන්න සුවඳ හා මුල්වල ඇති ඉමිහිරි රසය නිසා මනුෂ්‍ය භෝජනයට ඉතාමත් ආකර්ෂණීය වෙයි. සාමාන්‍යයෙන් පැය 3 ක් තුලදී මරණය සිදුවෙයි


එළුවන්ගේ ලේ උරාබොන චුපකාබ්රා Chupacabra ....

  ගුප්ත සත්ව විද්‍යාඥයින්ගේ අවධානය යොමුවුණු චුපකාබ්රා Chupacabra කියන සත්වයා වාසය කරන බවට තොරතුරු ලැබෙන්නේ ලතින් ඇමෙරිකාවෙන්. ඒ හැර ඇමෙරික...